[Postieri-Forumit]

Genc Kondi (Gazeta shqiptare)


Para tre vjetësh u mohoi vazhdimësinë e projektit të “trenit elektrik” në linjat Tiranë-Rinas dhe Tiranë-Durrës. Por dje, në selinë e Këshillit të Ministrave, kreu i Ekzekutivit, Sali Berisha, gjatë pritjes së delegacionit të kompanisë shumëkombëshe “General Electric”, i ka ofruar mundësi të tjera për investime këtij gjigandi botëror. Dukshëm, për të shmangur pagesën e 10 milionë eurove dëmshpërblim, të cilën kompania e ka fituar tashmë që një vit më parë në Arbitrazhin e Parisit, për shkak të anulimit të projektit madhor të modernizimit të linjave hekurudhore midis Tiranës, aeroportit ndërkombëtar të Rinasit dhe portit të Durrësit. Ky projekt u mohua kategorikisht nga qeveria ‘Berisha’ në vitin 2005, pasi ishte miratuar nga qeveria ‘Nano’, duke u cilësuar nga qeveritarët e rinj si një nga aferat korruptive të radhës të paraardhësve. Ndonëse në një moment, kryeministri Berisha kishte dhënë shpresa për afirmimin e këtij projekti, madje për zgjatjen e tij deri në Kavajë, ku ai është deputet. Por, përcaktimi i përparësive të tjera në investime, solli ndryshimin e kursit qeveritar. Shumë shpejt, një letër e nënshkruar nga tre ministra të qeverisë shqiptare do të shërbente si kërkesë zyrtare ndjese për gjigandin shumë-kombësh. Me këtë dokument, Ekzekutivi shqiptar sqaronte investitorët e huaj, të cilët, për herë të parë në historinë e ekonomisë së tregut, pas viteve 90-të, po bëheshin gati të realizonin një projekt me kredi tregtare, se objektivat e tyre kishin ndryshuar. Duke kaluar nga zonat e mbipopulluara të qendrës, ku çdo investim sjell shpejt fitimet, në investime infrastrukturore në zona të Verilindjes, ku duhen të paktën 20 vjet, për të kthyer investimet financiarisht. Një gjë e tillë nuk mundi të bindte kolosin “General Electric”, i cili, pas nënshkrimit të kontratës me qeverinë e mëparshme, e quajti të natyrshme të hidhte në gjyq qeverinë ‘Berisha’. Rezultati ishte, pak të thuash, skandaloz për vendin, duke qenë se Gjykata e Arbitrazhit e Parisit vendosi që Tirana zyrtare duhej të paguante për amerikanët 10 milionë euro dëmshpërblim.