[Postieri-Forumit]

Dhimitër Rëra (Gazeta shqiptare)
BERAT -Qyteti i një mbi një dritareve, Berati, rrezikon të mos pranohet në UNESKO, Organizatën për Ruajtjen dhe Mbrojtjen e Trashëgimisë Botërore. Ndonëse përpilimi i dosjes që do t’i dorëzohet UNESKO-s ka nisur që në vitin 2004, shumë prej detyrave që u janë caktuar institucioneve përkatëse nuk janë realizuar. Alarmi jepet nga specialistët e fushës së kulturës, të cilët dje kanë bërë me dije se në brendësi të zonave muzeale ndodhen 300 objekte pa leje. Ndërhyrjet e shumta në dëm të arkitekturës dalluese të qytetit të Beratit; zëvendësimi i dyerve e dritareve prej dërrase me materiale duro-alumin; ngritja e mureve rrethuese; prania e cisternave të ujit, antenave dhe objekteve të tjera të vendosura mbi çatitë karakteristike, bien ndesh me kushtet e vëna nga UNESKO. Ky problem është bërë prezent në takimin e parë të Komitetit të Koordinimit të Planit të Menaxhimit të Qendrave Historike të Gjirokastrës dhe të Beratit, si pasuri në seri. Gjatë takimit të zhvilluar në Bashkinë e Beratit, është diskutuar mbi problematikën e përgjithshme, mbi menaxhimin e dy qendrave historike. Komiteti, i cili ka marrë pak ditë më parë miratimin e Ministrisë së Kulturës, do ketë në fokus udhëheqjen dhe miratimin e planeve vjetore e shumë-vjeçare të vlerësimit të qendrave historike të qyteteve Gjirokastër e Berat, në lidhje me ndërhyrjet konservuese e restauruese. Gjithashtu, do punojë për gjetjen e fondeve alternative dhe nxitjen e turizmit. Sipas pjesëmarrësve në takim, marrja e masave në lidhje me problematikat e mësipërme është një ndër kushtet kryesore për kompletimin përfundimtar të dosjes së Beratit. Ndërkohë, takimi i radhës së UNESKO-s do të zhvillohet në Kanada më 10 korrik. Nëse detyrat e lëna do të plotësohen, Berati do të mund të merrte OK-in e pranimit në UNESKO. Por, kryetari i hartimit të dosjes së Gjirokastrës dhe Beratit, Emin Riza (njëkohësisht dhe anëtar i Komitetit të Koordinimit), është shprehur se detyrat e lëna që para katër vitesh ende nuk janë përmbushur. “Që nga viti 2004 janë përmbushur shumë pak detyra nga institucionet përkatëse. Në qytet janë plot 300 objekte pa leje që duhej të ishin shembur, me qëllim rikthimin në identitet të zonave muzeale. Janë të evidentuara 42 shtesa objektesh dhe 17 dritare të reja”, - është shprehur profesor Riza. Ai ka deklaruar se duhet të veprohet me urgjencë, pasi ridiskutimi i dosjes në UNESKO do bëhet brenda pak ditëve.